सल्ला नेहमी तुळेच्या मंडळींकडून घ्यावा. तो बऱ्यापैकी समतोल असतो. मेष आणि वृश्चिकेची मंडळीही सल्ला देतात; पण तो अत्यंत एकांगी आणि बराचसा आक्रमक पर्यायाचा असतो. मीन राशीची मंडळी सल्ला देताना सरतेशेवटी तुम्हालाच दोन पर्याय देऊन कन्फ्यूज्ड ठेवतात आणि सल्ला देतच नाहीत. सिंह राशीची माणसंही उत्तम सल्लागार असतात; पण त्या सल्ल्याचा पुढे त्यांच्या स्वतःच्या आयुष्याशी कधी संबंध येणार नाही हे अगोदर कन्फर्म करतात. मकर आणि वृषभेची मंडळी सल्ला दिल्यानंतर तुम्हाला गरज वाटली तर त्यांच्या हातातील महत्त्वाची कामं बाजूला ठेवून तुमच्याबरोबर यायलाही तयार होतात.
उदा. तहसीलदारांना भेटू की नको?
तूळ : मला वाटतं भेट तू. जाताना एक लेखी अर्ज आणि त्याची फोटो कॉपी घेऊन जा. Received with sign कर. अमुक तमुक मुद्दे कव्हर कर आणि परत ये.
मेष/वृश्चिक : नक्की जा, कसं काम करत नाही तेच बघ. त्यांना म्हणावं माझा भाऊ xxxxमधे पत्रकार आहे. मोबाइलचं रेकॉर्डिंग सुरू ठेव.... बघू आपण.
मीन : खरं म्हणजे तू जाऊच नको. त्यांना भेटून काही होईल असं मला वाटत नाही. किंवा एक काम कर एकदा भेटून बघच... एकदा भेटायला काय हरकत नाही.
सिंह : भेटायला हवंच. काही हरकत नाही; पण बोलता बोलता चव्हाण साहेबांना माझा रेफरन्स देऊ नको. होणारं काम बिघडेल तुझं... चव्हाणांच्या मते मी अभिमन्यू जगतापांचा माणूस आहे. उगाच तुझं काम बिघडायला नको. माझ्याविषयी विचारलं तर ओळखत नाही असं बिनधास्त सांग...
मकर/वृषभ : तहसीलदारांना भेटायला हवंच. एक काम करू. जेव्हा जाणार आहे तेव्हा मला सांग. माझीच स्विफ्ट काढून जाऊ आपण. उद्या जायचं का बोल? ॲक्चुअली उद्या माझी एक मीटिंग आहे कोकणभवनला पण... सोड. तुझं काम उरकून मग आपण दोघे जाऊ. आणि येताना पामबीच रोडवरून येऊ. तिथे एक भारी सीफूड रेस्टॉरंट आहे.
विनोदबुद्धी
मिथुन राशीची माणसं अतिशय उत्तम विनोदबुद्धी असणारी असतात यात शंकाच नाही; पण यांचे विनोद हे प्रासंगिक आणि इन्स्टंट असतात. यांचा सगळ्यात मोठा प्रॉब्लेम म्हणजे नेमका कुठे आणि कोणत्या प्रसंगी विनोद करावा, ते यांना समजत नाही आणि एकदा हसायला सुरुवात केली की यांना आवरता आवरत नाही.
कुंभेची मंडळी शनिप्रधान आणि धीरगंभीर वाटली तरी यांचे विनोद अत्यंत उच्च दर्जाचे आणि शब्दनिष्ठ असतात. ते दीर्घ काळ स्मरणात राहतात. विनोद करूनही स्वतःचा चेहरा गंभीर ठेवणं आणि अनेकदा स्वतःवरच विनोद करणं यांना बखुबी जमतं.
- सचिन मधुकर परांजपे (पालघर)
